Heimilislaus í Rúmeníu: Lést í holræsunum eftir að þátturinn birtist

Sjónvarpsmaðurinn Paraic O'Brien sneri aftur til holræsanna í Búkarest í Rúmeníu til þess að verða við jarðaför eins viðmælanda síns í heimildarþættinum sem hann vann um heimilislausa einstaklinga þar í landi. Vísir fjallaði um málið um helgina. Viðmælandinn var stúlka að nafni Catalina sem var nýorðin 18 ára. Hún lést af hjartabilun vegna HIV-smits en hún hafði verið veik um skeið.

Catalina sagði í viðtalinu við sjónvarpstöðina Channel 4 News áður en hún lést að hún hefði verið yfirgefin af foreldrum sínum þegar hún var nýfædd en að holræsin væru staðurinn þar sem hún hafði tortímt sér. Þar hafði hún búið síðan hún var ellefu eða tólf ára. 

Í myndskeiðinu sem fylgir fréttinni má sjá þá helgiathöfn sem fram fór við jarðarför Catalinu. Hún er klædd í brúðarkjól en það er siður sem tíðkast í Rúmeníu, að klæða ógiftar konur í brúðarklæði þegar þær eru grafnar í jörðu. Bruce Lee, konungur holræsanna eins og hann kallar sig, kom í jarðaförina með hárið þakið aurolac, málningunni sem eiturlyfjaneytendurnir anda að sér úr litlum svörtum pokum.

Paraic O'Brian spyr sig hvort dauði sé eina leiðin úr því víti sem vistin í holræsunum er. Yfirvöld í Rúmeníu eru ráðalaus gagnvart vandanum. Það kemur ekki til greina að fylla upp í holuna enda myndi það einfaldlega þvinga fólkið sem þar býr út á göturnar þar sem bíður þeirra enn verri vist.

Fyrir neðan má sjá þáttinn þar sem O'Brian snýr aftur til Búkarest og hittir þar Bruce Lee og fleiri íbúa holunnar. Einnig er í fréttinni að finna viðtal við O'Brian um þá reynslu sem hann varð fyrir.

.

.