Hundruð hafast við í holræsum undir lestarstöð

Hundruð heimilislausra eiturlyfjaneytanda búa í holræsum Búkarest, höfuðborgar Rúmeníu, undir stærstu lestarstöð landsins Gara de Nord. Þetta afhjúpaði sjónvarpstöðin Channel 4 í Bretlandi fyrr í sumar en tökur standa yfir á nýjum heimildarþætti nú í september samkvæmt heimildum Vísis. Þáttur Channel 4 er neðst í fréttinni og sjón er sögu ríkari.

Heimilislausu einstaklingarnir hafa nær allir smitast af HIV vegna sprautunotkunar en þó er helsta fíkniefnið á staðnum málningin aurolac sem þau anda að sér úr litlum pokum. Mörg þeirra eru heimilislaus síðan einræðisherrann Nicolae Ceaușescu var hrakinn frá völdumárið 1989 en á meðan á valdatíð hans stóð bannaði hann fóstureyðingar og getnaðarvarnir sem olli því að fjöldi barna fæddist sem foreldrarnir gátu ekki hugsað um. Munaðarleysingjahæli fylltust því en þau voru mörg hver lögð niður í kjölfar þess að stjórnkerfið breyttist. 

Þáttagerðarmaðurinn Paraic O‘Brien fékk að heimsækja vistarverur þessara heimilislausu einstaklinga en aðstæðunum lýsti hann á þann veg að ef það væru partýhöld í helvíti væru þau sambærileg aðstæðunum þarna neðanjarðar. Hitinn er mikill og há popptónlist glymur í þröngum herbergjunum.

Maður einn sem kallaður er Bruce Lee er yfir hópnum, hann sér fólkinu fyrir húsaskjóli og vernd en sér þeim jafnframt fyrir eiturlyfjum. Hann kallar sjálfan sig konung holræsanna eða King of the Sewers og klæðist keðjum á höndum og fótum.

Heimildarþáttinn má sjá í myndbandinu hér að neðan og einnig á vefsíðu Channel 4 News. Myndirnar tók Radu Ciorniciuc.

.

.

.

.