Óttast skemmdir á heimili vegna tíðra sprenginga

Við óttumst að húsið okkar verði fyrir skemmdum. Þetta segja íbúar í grennd við gamla Lýsisreitinn í Vesturbæ Reykjavíkur. Unnið er að því að sprengja upp klöpp á reitnum með tilheyrandi ónæði fyrir íbúa á svæðinu. Sprengt er frá morgni til kvölds.

Fjallað var um málið í kvöldfréttum Stöðvar 2 í kvöld og mátti þar meðal annars sjá hversu öflugar sprengingarnar eru. Reisa á um 500 manna byggð á gamla Lýsisreitnum og þarf að sprengja tvisvar til fimm sinnum á dag til að hægt sé að fjarlægja jarðveg. Byggðin á reitnum er umdeild og framkvæmdirnar fara einnig illa í íbúa í grennd við framkvæmdarsvæðið.

Búa skammt frá framkvæmdasvæðinu

Hjónin Svanlaug Rós Þorsteinsdóttir og Xavier Rodriguez búa í næsta nágreni við Lýsisreitinn. Nokkuð högg kemur á hús þeirra hjóna þegar sprengt er innan við hálfum kílómetra frá heimili þeirra.

„Það er verið að sprengja hérna 3-5 sinnum á dag og þá hristist allt húsið og allir innanstokksmunir. Það er óskemmtilegt og mikið ónæði af þessu,“ segir Svanlaug.

Þolir 70 ára gamalt hús 300 skjálfta?

Svanlaug og Xavier búa í 70 ára gömlu húsi skammt frá framkvæmdasvæðinu og hafa áhyggjur af því að skemmdir gætu orðið á heimili þeirra vegna tíðra sprenginga.

„Við erum áhyggjufull yfir því. Þetta er gamalt hús sem við búum í. Þetta er eins og fimm jarðskjálftar á dag og ef þetta á að standa yfir í þrjá mánuði þá erum við komin með u.þ.b. 300 jarðskjálfta. Hvort að 70 ára gamalt hús þolir það veit ég ekki,“ bætir Svanlaug við.

Sprengingar í Vesturbænum taka að öllum líkindum enda í lok mars. Verkefnastjóri hjá Þingvangi sem stýrir framkvæmdum telur að það hafi verið rétt ákvörðun að sprengja frekar en að nota stórtækar vinnuvélar.

„Við töldum að það yrði minna ónæði fyrir íbúanna að það yrði sprengt 3-5 sinnum yfir daginn í stað þess að hér væru stórvirkar vinnuvélar með fleyga að pikka í bergið,“ sagði Matthías Geir Ásgeirsson, verkefnastjóri hjá Þingvangi ehf.