Sjóræningjar stöðvaðir

Sjóránum undan ströndum Sómalíu hefur fækkað mikið á síðustu misserum en sjórán á svæðinu voru mikið vandamál á árunum 2008 til 2010. Árin 2009 og 2010 áttu sér stað um 50 sjórán hvort ár en nú er svo komið að skipi hefur ekki verið rænt á svæðinu í tólf mánuði.

Samkvæmt skýrslu Sameinuðu þjóðanna er bætt ástand á svæðinu einkum rakið til þriggja þátta: aukinnar gæslu herskipa, aðgerða keníska hersins gegn herskáum íslamistum í Sómalíu og meiri aðgátar skipaeigenda.

Þá hefur árásum á skip á svæðinu einnig fækkað, úr ríflega 100 árið 2011 í 24 í fyrra.