Leyninet fyrirtækja sem stendur að baki hrossakjötshneykslinu

Hrossakjötshneykslið sem skakið hefur Evrópu að undanförnu tók óvænta stefnu í gær. Þá var upplýst að milligönguaðilar við sölu hrossakjöts hafa notað svipað leyninet fyrirtækja og vopnasalinn Viktor Bout studdist við áður en hann var ákærður og dæmdur fyrir ólöglega vopnasölu.

Þungamiðjan í þessu neti virðist vera fyrirtækið Draap Trading sem skráð er í Limassol á Kýpur. Greint er frá þessu í breska dagblaðinu Guardian.

Fulltrúar Draap hafa gengist við því að hafa keypt hrossakjöt frá tveimur rúmenskum slátarhúsum.

Fyrirtækið seldi kjötið til franskra matvælaframleiðenda. Þeirra á meðal er Spanghero sem hefur selt birgjum Findus kjöt, en Findus selur tilbúnar frosnar máltíðir.

Sem kunnugt er hafa tilbúnar frosnar máltíðir frá Findus í sumum tilvikum reynst 100 prósent hrossakjöt þótt þær hafi verið seldar undir þeim formerkjum að um nautakjöt væri að ræða.