Knútur snýr aftur uppstoppaður

Hvítabjörninn Knútur drapst árið 2011 úr alvarlegri heilabólgu, engu að síður lifir frægðarsól hans enn. Nú geta aðdáendur hans tekið kæta sína á ný en Knútur situr nú uppstoppaður á safni í Berlín.

Undanfarna mánuði hafa uppstopparar unnið nær sleitulaust að því að klæða feld Knúts á járngrind. Knútur vakti fyrst athygli árið 2007 eftir að móðir hans afneitaði honum. Hann var því alinn upp í dýragarði í Berlín. Hróður Knúts barst víða enda þótti dýrið með eindæmum fallegt.

Í samtali við fréttaveituna AP sagði talsmaður safnsins að þó nokkur fjöldi fólks hefði lýst óánægju sinni með uppátækið. Því var haldið fram að Knútur hefði átt að hvíla í friði.