Páfinn kveður í dag

Benedikt XVI, fæddur Joseph Aloisius Ratzinger, lætur af störfum páfa í dag, aðeins rúmum tveimur vikum eftir að hann tilkynnti um afsögn sína.

Í dag mun páfi kveðja kardínála og starfsfólk í Vatíkaninu við litla athöfn, en það er kardínálinn Tarcisio Bertone sem sinnir skyldum páfa uns nýr verður valinn í næsta mánuði. Að athöfninni lokinni mun páfi fljúga til þorpsins Castel Gandolfo, þar sem hann mun dvelja þar til nýr páfi hefur verið valinn.

Um klukkan hálf fimm í dag mun hann koma fram opinberlega í síðasta sinn sem páfi, en það verður á svölum aðseturs páfans í Castel Gandolfo. Þar er reiknað með að um 7000 manns muni kveðja páfann í hinsta sinn, en í kjölfarið mun Benedikt XVI draga sig úr sviðsljósinu.

Í kveðjuræðu sinni, sem haldin var á torgi heilags Péturs í gær fyrir framan 150.000 áhorfendur, ýjaði páfi að deilum innan Vatíkansins, en Benedikt XVI er fyrsti páfinn til að segja af sér í tæp 600 ár.

Hann mun setjast að í klaustri innan Vatíkansins og verður óheimilt að skipta sér opinberlega af störfum hins nýja páfa, þó hann megi veita honum ráðgjöf.