Lík af rússneskum stjórnmálamanni fannst steypt niður í olíutunnu

Átta manns hafa verið handteknir í kjölfar þess að líkið af rússneskum stjórnmálamanni fannst steypt niður í olíutunnu í úthverfi Moskvu um síðustu helgi.

Stjórnmálamaðurinn sem hér um ræðir hét Mikhail Pakhomov en hann var borgarfulltrúi í borginni Lipetsk í miðju Rússlandi.

Pakhomov hvarf þann 12. febrúar s.l. og hafði ekkert spurst til hans fyrr en lík hans fannst í olíutunnunni í kjallara undir bílageymslu í einu af úthverfum Moskvu um síðustu helgi.

Í fréttum í rússneskum fjölmiðlum um þetta mál segir að lögreglan telji að peningar liggi að baki morðinu á Pakhomov. Hann er sagður hafa skuldað fyrrum háttsettum embættismanni í Moskvu, Jevgenij Kharitonov að nafni, háar fjárhæðir. Þessi embættismaður er einn hinna handteknu en hann var gripinn á Sjeremetjevo flugvellinum í Moskvu fyrir þremur dögum þegar hann reyndi að flýja land.

Kharitonov er einnig grunaður um að hafa stolið um 400.000 rúblum eða hátt í tveimur milljónum króna frá Pakhomov.