Kjötlaus konsert hjá Morrissey

Ekkert kjöt verður á boðstólum matarvagnanna á Staples Center-íþróttahöllinni í Los Angeles þegar breski söngvarinn Morrissey kemur þar fram þann 1. mars.

Söngvarinn, sem er grænmetisæta og dýraverndunarsinni, hvatti forsvarsmenn Staples Center til þess að loka McDonald's útibúum hallarinnar og var það samþykkt.

Verður þetta í fyrsta sinn í sögunni þar sem allir matarvagnar í höllinni og í kring um hana bjóða eingöngu upp á grænmetisfæði. Einnig mun hluti ágóðans af miðasölunni renna til dýraverndunarsamtakanna PETA.

Morrissey segir kjötleysið í Staples Center ekki vera persónulegan sigur, heldur sigur fyrir dýrin.