Vísbendingar um að útrunnið kjöt hafi verið endurunnið

Matvælaeftirlitið í Póllandi hefur lokað kjötvinnslu þar í landi eftir að hafa fengið vísbendingar um að þar hafi útrunnið kjöt verið endurunnið í nýjar vörur.

Ásakanir á hendur fyrirtækinu komu fram í sjónvarpsþætti sem sýndi myndir sem voru teknar með falinni myndavél í kjötvinnslunni. Þar sást að útrunnið kjöt sem verslanir höfðu endursent var notað í pylsur og skinku. 

Fréttamaður þóttist vera að sækja um starf í kjötvinnslunni og ræddi við nokkra starfsmenn. Myndirnar sem hann tók í ferð sinni um vinnsluna sýna starfsmenn ná í kjöt sem verslanir hafa endursent og setja í vinnslu.

Einn starfsmaður sést taka upp myglaða pylsu og segja að hún muni verða hreinsuð, þurrkuð og endurunnin.

Vörur frá kjötvinnslunni eru meðal annars seldar til Bretlands, Írlands og Þýskalands. Eigandi vinnslunnar neitar öllum ásökunum.

Málið kemur upp í kjölfarið á hrossakjötshneykslinu en þá fannst hrossakjöt í kjöti sem var merkt sem nautakjöt frá þremur kjötvinnslum í Póllandi.