Biðja um frið til að jafna sig

Amanda Berry, Gina DeJesus og Michelle Knight, sem frelsaðar voru úr kynlífsánauð í Cleveland í Bandaríkjunum á mánudag, gáfu frá sér yfirlýsingu í gær. Biðja þær um frið til að jafna sig en segjast jafnframt þakklátar fyrir þann gríðarlega stuðning sem þær hafa fundið.

„Ég er rosalega hamingjusöm yfir því að vera komin heim. Ég vil þakka fyrir allan stuðninginn sem ég hef fundið og allar bænirnar. Nú vil ég einungis fá frið til að verja tíma með fjölskyldu minni,“ sagði DeJesus í yfirlýsingu sem lögmaður hennar las fyrir fjölmiðla.

Konunum þremur, sem eru nú á þrítugs- og fertugsaldri, var rænt á árunum 2002 til 2004 þegar þær voru 14 ára, 16 ára og 20 ára. Að sögn lögreglu hafa þær síðan dvalið í ánauð á heimili Ariels Castro þar sem þeim var ítrekað nauðgað og einungis leyft að fara út úr húsi í örfá skipti.

Castro, sem er 52 ára gamall fyrrverandi skólabílstjóri, hefur verið ákærður fyrir mannrán og nauðganir. Þá hefur saksóknari lýst því yfir að hugsanlega verði Castro ákærður fyrir morð en talið er að hann hafi samtals fimm sinnum orsakað fósturlát hjá konunum þremur. Verði Castro ákærður fyrir morð gæti hann átt yfir höfði sér dauðarefsingu.