Tók eina vakt sem flugfreyja

Auðkýfingurinn Richard Branson tók eina vakt sem flugfreyja í flugi AirAsia frá Perth til Malasíu í gær.

Forsaga málsins er sú að árið 2010 veðjaði Branson, sem er þekktastur fyrir að stofna fyrirtækið Virgin Group (flugfélagið Virgin Airlines er rekið undir merkjum þess), við Tony Fernandes eiganda AirAsia um úrslit í Formúlu 1-kappakstrinum.

Báðir eiga þeir lið í Formúlunni og hljóðaði veðmálið svo að eigandi þess liðs sem næði lakari árangri í keppninni þyrfti að klæða sig í flugbreyjubúning og taka eina vakt hjá flugfélagi hins.

Lið Fernandes endaði tveimur sætum ofar en lið Branson, og í gær lauk veðmálinu þegar Branson mætti í flugið með nýrakaða leggina, setti á sig varalit og smellti sér í rauða dressið sem sjá má á myndunum.

Branson hellti drykkjum yfir Fernandes í fluginu og var rekinn eftir vaktina. Fernandes sagði hann vera ömurlegan flugþjón og sagðist hafa viljað drepa Branson þegar hann hellti drykkjunum yfir hann.

Var haft eftir einum farþeganna að hann hefði árum saman litið upp til Richards Branson, og nú hefði hann litið upp undir pilsið hans.

Uppátækið var liður í fjáröflun fyrir Starlight-samtökin, en þau styðja við langveik börn í Ástralíu. Söfnuðust um 300 þúsund dala í fjáröfluninni, um 36 milljónir íslenskra króna.