Tók sjálfsmynd með sjálfsmorðstilraun í bakgrunni

Kona sem tók sjálfsmynd við Brooklyn-brúna í New York rataði á forsíðu New York Post í gær, en myndin þykir ósmekkleg vegna þess að í bakgrunninum sjást björgunarmenn koma karlmanni í sjálfsmorðshugleiðingum til bjargar á brúnni.

Ljósmyndin á forsíðunni er reyndar af konunni að taka mynd, en ekki myndin sjálf, en New York Post þykist greina glott á vörum konunnar.

Hún vildi ekki tjá sig um málið, en sjálfsmyndir á Instagram og fleiri samfélagsmiðlum hafa lengi verið vinsælar. Undanfarið hafa þær orðið óvenjulegri, og má þar nefna jarðarfararsjálfsmyndir, þar sem fólk myndar sig í jarðarförum vina og ættingja.

Björgunarmenn náðu á endanum að koma manninum af brúnni.