Rændu skartgripaverslun í jólasveinabúningum

Ekki koma allir þeir sem klæddir eru sem jólasveinar, færandi hendi þessi jólin. Það fékk skartgripasali í Tirana í Albaníu að reyna í gær en frá þessu greinir á vef The Guardian.

Fjórir menn, íklæddir jólasveinabúningum þustu inn í verslun hans skömmu fyrir lokun á jóladag, vopnaðir skammbyssum og hríðskotarifflum og rændu skartgripasalann.

Aðeins eigandinn og eiginkona hans voru í búðinni þegar ránið var framkvæmt en Jólasveinarnir fylltu poka sína af dýrmætum skartgripum áður en þeir flúðu vettvanginn á Mercedes Bens bifreið. Hún fannst síðar yfirgefin á afskekktum stað, brunnin til grunna. Þjófanna er nú leitað en lögreglan mun hafa litlar vísbendingar um hverjir stóðu að baki ráninu. Myndband af ráninu má sjá á vefsíðunni LiveLeak.com.