Facebook "vinur" reyndist vera glæpagengi sem rændi unglingsstrák

13 ára Pakistönskum dreng sem var rænt eftir að hafa ætlað að hitta Facebook vin sinn í Karachi hefur verið bjargað úr höndum mannræningjanna.

Lögregluyfirvöld í Pakistan segja að Facebook „vinurinn" hafi í raun verið gengi sem þóttist vera strákur sem spilaði tölvuleiki á netinu. Glæpamennirnir plötuðu drenginn á sinn fund og rændu honum. Að því búnu heimtuðu þeir hálfa milljón dollara í lausnargjald fyrir drenginn.

Mannrán er algengur glæpur skæruliða og glæpamanna í Pakistan, en mál þar sem samskiptamiðlar koma við sögu eru fáséð.

Að sögn þarlendra fjölmiðla komst gengið í tengsl við drenginn fyrir nokkrum mánuðum í gegnum netið. Drengurinn er að sögn sonur háttsetts embættismanns hjá tollayfirvöldum.

Lögreglan mun hafa notast við símtalaskrár mannanna til að hafa uppi á drengnum og fjórir mannanna létust í björgunaraðgerðum lögreglu.

Móðir drengsins ítrekaði fyrir öðrum foreldrum að þeir yrðu að fylgjast með notkun barna sinna á samfélagsmiðlum: „Það er ósk mín til allra foreldra að leyfa börnum sínum ekki að afla vina í gegnum Facebook," og bætti við: „Í guðanna bænum gerið það ekki."

Nánar á vef BBC.