Suður-Kórea stækkar loftvarnasvæði

Stjórnvöld í S-Kóreu tilkynntu í gær stækkun loftvarnasvæðis landsins yfir Austur-Kínahafi í kjölfar þess að kínversk stjórnvöld stofnuðu svipað svæði yfir umdeildu rifi. Áður hafði S-Kórea farið fram á að Kína drægi saman loftvarnasvæði sitt, þar sem það færi inn á svæði S-Kóreu, en þeirri beiðni var hafnað. Stofnun loftvarnasvæðis Kína hefur valdið aukinni spennu á svæðinu.

Bandaríkin, Japan og fleiri þjóðir hafa mótmælt loftvarnasvæði Kína, sem stofnað var í síðasta mánuði. Þá gáfu yfirvöld í Peking út yfirlýsingu um að allar flugvélar sem fljúgi inn á svæðið þurfi að tilkynna sig og hlýða skipunum frá Kína.

Herflugvélar frá Bandaríkjunum, Japan og S-Kóreu hafa flogið í gegnum svæðið án þess að tilkynna sig, til að mótmæla loftvarnasvæði Kína. Einnig hefur flugfélögum verið ráðlagt að breyta ekki flugleiðum sínum né tilkynna flugvélar sínar þegar þær fljúga um svæðið.

Hið nýja svæði Kóreumanna nær yfir umdeilt rif, sem S-Kórea stjórnar og rekur rannsóknarstöð á, en Kína hefur gert tilkall til rifsins. Þá stækka þau svæði sem bæði ríkin segjast stjórna. Þetta er í fyrsta sinn sem loftvarnasvæði S-Kóreu er breytt frá stofnun þess í Kóreustríðinu árið 1951.

Kim Min-Seok, talsmaður varnarmálaráðuneytis S-Kóreu, sagði að ríkið myndi ræða við grannríki sín um skref til að koma í veg fyrir árekstra innan loftvarnasvæðisins. Hann sagði einnig að svæðið færi ekki inn fyrir lofthelgi annarra ríkja og að yfirvöld í Seúl hefðu útskýrt aðgerðirnar fyrir nágrönnum sínum.

Stjórnvöld í Bandaríkjunum styðja aðgerðir S-Kóreu og segja að aðgerðin komi í veg fyrir rugling og ógnir gagnvart farþegaflugi. „Bandaríkin hafa verið og munu verða í nánu samstarfi við bandamenn okkar og félaga á svæðinu til að tryggja að aðgerðir þeirra stuðli að auknu jafnvægi, fyrirsjáanleika og séu í samræmi við alþjóðlegar venjur,“ sagði Jen Psaki, talsmaður utanríkisráðuneytis Bandaríkjanna.