„Takk Kata“

EM-ævintýri stelpnanna okkar endaði í gær með skelli á móti sterku liði Svía. Svíar unnu öruggan 4-0 sigur og tryggðu sér sæti í undanúrslitum á EM. Þetta var frábær keppni hjá íslensku stelpunum þótt endirinn hafi verið snubbóttur.

Vissulega voru stelpurnar súrar og svekktar í leikslok að hafa ekki veitt þeim sænsku meiri keppni en byrjun leiksins varð algjör örlagavaldur í þessum stærsta leik í sögu íslensks fótbolta. Allt sem mátti ekki gerast í upphafi leiks gerðist og eftirleikurinn var auðveldur fyrir sænska liðið sem skoraði fyrsta markið á 3. mínútu og var komið 3-0 yfir eftir tuttugu mínútur.

Það var hins vegar annars konar dramatík sem tók við eftir leikinn þegar öllum varð ljóst að landsliðsfyrirliðinn væri að kveðja stelpurnar. Mögnuðum ferli lauk nefnilega á Örjans Vall í Halmstad í gær. 19 ára landsliðsferli Katrínar Jónsdóttur lauk þegar hún fékk heiðursskiptingu tíu mínútum fyrir leikslok. Í stað hennar kom Glódís Perla Viggósdóttir inn á, sem margir sjá sem eftirmann hennar í liðinu.

Táknræn stund

„Það var táknræn stund þegar Glódís kom inn á fyrir Kötu. Kata hefur átt stórkostlegan landsliðsferil. Hún átti frábært mót og á mikinn heiður skilinn að hafa leitt liðið svona langt í þessari keppni,“ sagði landsliðsþjálfarinn Sigurður Ragnar Eyjólfsson.

„Það er leiðinlegt að við gátum ekki gefið henni betri leik. Hún er búin að eiga stórkostlegan landsliðsferil og ég vona að hún geti bara hugsað um Hollandsleikinn eða eitthvað,“ sagði Guðbjörg Gunnarsdóttir, markvörður íslenska liðsins, eftir leikinn.

„Ég vildi enda þetta á betri leik og var að reyna það eftir leik að sækja einhverjar minningar frá Hollandsleiknum til þess að líða aðeins betur. Ég hugsa að það þurfi að líða smá tími og þá áttum við okkur á því hvaða árangri við höfum náð. Þetta er frábær árangur og nú vona ég að Ísland komi aftur á stórmót og nái að bæta þetta,“ sagði Katrín Jónsdóttir en hún gat ekki haldið aftur af tárunum í leikslok.

Grét eins og smábarn

„Ég var hálftóm í hausnum þegar ég var tekin út af og eftir leikinn voru meiri tilfinningar í gangi. Ég grét eins og smábarn en svona er þetta bara. Þetta er skrýtið, ég er búin að vera svo lengi í þessu og fótbolti er alltaf búinn að vera númer eitt. Ég elska að spila fótbolta og fórna öllu fyrir hann. Ég flutti 650 kílómetra til þess að geta verið í sem bestu standi til að spila fyrir landsliðið. Það er svolítið skrýtið að þetta sé búið. Það tekur víst eitthvað annað við en það segja þær mér þessar stelpur sem hafa hætt,“ segir Katrín brosandi.

„Ég er sátt með mína frammistöðu og með frammistöðu liðsins. Það voru allir að leggja sig hundrað prósent fram og við náðum okkar markmiðum. Við ætluðum ekki að vera saddar og ætluðum að komast lengra. Við lentum á mjög góðum degi hjá Svíþjóð. Við getum byggt ofan á þetta. Það eru að koma upp ungar og efnilegar stelpur sem eru orðnar góðar. Ég held að framtíðin sé björt,“ sagði Katrín.

Fyrirmynd fyrir okkur allar

Það voru fleiri en Katrín sem táruðust í leikslok. „Það er að sjálfsögðu erfitt að horfa á eftir henni. Katrín er frábær manneskja og frábær knattspyrnukona. Hún er mikil fyrirmynd fyrir okkur hinar með því að vera svona lengi í þessu og standa sig svona vel. Hennar verður sárt saknað,“ sagði Margrét Láta, sem reyndi að setja sig í spor Kötu.

„Ég fór að hágráta þegar hún kom út af því ég á eftir að sakna hennar og ég veit líka hvað þetta er erfitt fyrir hana. Hún getur verið virkilega stolt af sinni frammistöðu og öllu sem hún hefur gert fyrir íslenska kvennaknattspyrnu,“ sagði Margrét Lára.

Það verður vissulega skrýtið að sjá enga Katrínu Jónsdóttur þegar íslenska kvennalandsliðið mætir til leiks í undankeppni HM. Það spilar enginn endalaust og það vissu allir að það kæmi að þessari stundu. Við kvöddum Ólaf Stefánsson í júní og kveðjum Katrínu Jónsdóttur í júlí. Mikilvægi þessara tveggja miklu leiðtoga verður aldrei metið til fulls og það er full ástæða til að segja: „Takk Kata“.