Morðið í London talið hryðjuverkaárás

Sterkar vísbendingar eru um að morðið sem átti sér stað á miðvikudaginn í suðausturhluta Lundúna hafi verið hryðjuverkaárás. David Cameron, forsætisráðherra Bretlands, boðaði til neyðarfundar í gær vegna árásarinnar til að ræða viðbrögð við henni og ótta við hryðjuverk í Lundúnum.

Boris Johnson borgarstjóri hefur beðið fólk um að halda ró sinni og segir árásina hafa verið einstakt tilvik. Árásin átti sér stað seinnipartinn á miðvikudaginn þegar tveir menn réðust á annan með kjötöxum og myrtu hann.

Vegfarandi tók annan árásarmannanna upp á myndband skömmu eftir árásina þar sem hann sést hrópa pólitískar fullyrðingar um „auga fyrir auga“ með blóðugar hendur og sveiflandi kjötexi. Hann segir breska hermenn drepa múslíma á degi hverjum og sver við Allah að „við“ munum aldrei hætta að berjast við „ykkur“.

Lögreglan handtók árásarmennina tvo eftir átökin og voru þeir báðir fluttir á sjúkrahús með skotsár, annar alvarlega særður. Fórnarlambið var breskur hermaður og hefur öryggi í kringum svæði hersins í borginni verið hert. Bresk yfirvöld segja að árásin hafi verið knúin áfram af hugmyndafræði öfga múhameðstrúar. Múslímskir söfnuðir voru fljótir að fordæma árásina, þeir sögðu ekkert réttlæta hana og hvöttu lögregluna til að reyna að draga úr spennunni. - ig