Páfi kopta sækir Vatíkanið heim

Tawadros annar, páfi Koptísku kirkjunnar í Egyptalandi, er lagður af stað í opinbera heimsókn til Vatíkansins, að sögn starfsmanna kirkjunnar. 40 ár eru liðin síðan páfi kopta heimsótti síðast Vatíkanið.

Sex prestar og biskupar eru í för með Tawadros í sex daga heimsókn hans, sem gerð er til að óska Frans, nýjum páfa kaþólskra, til hamingju. Tawadros er líka nýr í embætti, en hann tók við í fyrra.

Koptíska kirkjan klofnaði frá þeirri kaþólsku á fimmtu öld vegna deilna um veldisskipan kirkjunnar og er til í Egyptalandi og Eþíópíu. Um tíu prósent Egypta eru koptar.