Nýgiftur lést eftir árás hákarls

Þrjátíu og sex ára gamall Frakki í brúðkaupsferð lét lífið í hákarlaárás á frönsku eyjunni Reunion í Indlandshafi síðdegis á miðvikudag. Maðurinn hafði verið við leik á brimbretti undan strönd Brisants de Saint-Gilles meðan eiginkona hans sólaði sig á ströndinni.

Hákarlinn réðist að sögn yfirvalda á staðnum tvisvar á manninn og beit hann í handlegg og læri. Að því er fram kemur í frásögn Metro í Bretlandi varð annar strandgestur var við blóð í sjónum og forðaði, með strandvörðum, manninum í land þar sem honum blæddi út.

Gestum strandarinnar hefur verið meinað að fara í sjóinn á meðan hákarlsins er leitað þótt enn megi sóla sig þar. Hákarlaárásin er sú fyrsta á staðnum á þessu ári, en síðustu tvö ár hafa þrír látist í hákarlaárásum við Reunion. -