Hópur sýrlenskra uppreisnarmanna hefur tekið fjóra friðargæsluliða Sameinuðu þjóðanna í gíslingu. Þetta er önnur gíslataka uppreisnarmanna í kringum Gólanhæðir á undanförnum tveimur mánuðum, en 21 friðargæsluliða var rænt í mars síðastliðnum.
Sameinuðu þjóðirnar hafa staðfest gíslatökuna og segja að gæsluliðarnir fjórir séu allir frá Filippseyjum. Þeim var rænt í nágrenni við bæinn Jamla í suðurhluta Sýrlands. Þegar voru hafnar samningaviðræður við uppreisnarmennina um að láta friðargæsluliðana lausa.
Friðargæsluliðunum sem var rænt í mars síðastliðnum var sleppt lausum fjórum dögum síðar eftir stífar samningaviðræður.
Hópur uppreisnarmanna, sem kallar sig Yarmouk-píslarvottaflokkinn, hefur lýst mannránunum á hendur sér. Hópurinn segist hins vegar ekki vera með gæsluliðana í gíslingu heldur sé þeim haldið til að vernda öryggi þeirra.
Friðargæsluliðar hafa gætt Gólanhæða frá árinu 1974, til að halda frið á milli Ísraels og Sýrlands. Gíslatökurnar eru sagðar hafa sýnt fram á varnarleysi friðargæsluliðanna í stríðinu í Sýrlandi. Vaxandi spenna hefur verið á milli ríkjanna undanfarið.
Tóku fjóra friðargæsluliða í gíslingu í gær
Fleiri fréttir
