Nítján látnir eftir gassprengingu

Minnst nítján létust og tæplega fjörutíu slösuðust þegar gasflutningabíll sprakk í loft upp skammt norðan Mexíkóborgar í Mexíkó snemma í gærmorgun.

Mikill eldur blossaði upp þegar sprengingin varð og barst hann í nærliggjandi bíla og hús. Alls brunnu um fimmtán bílar og eldur kviknaði í 27 húsum. Lögreglumenn sögðu í gær ekki útilokað að tala látinna gæti hækkað. Enn var verið að leita í rústum húsa og flökum bíla.

Bíllinn lenti í árekstri, sem varð til þess að hann sprakk. Slysið vakti athygli á tveimur öryggisvandamálum í Mexíkóborg, miklum þungaflutningum bíla, sem lenda reglulega í alvarlegum slysum, og byggingu húsa alveg við stórar hraðbrautir.