Ísraelsher lætur sprengjum rigna á höfuðborg Sýrlands

Ísraelsher gerði loftárás á Damaskus, höfuðborg Sýrlands, aðfaranótt sunnudags. Sýrlenskum og ísraelskum stjórnvöldum ber ekki saman um hvert skotmark árásarinnar hafi verið. Samkvæmt ísraelskum stjórnvöldum var markmið árásarinnar að eyða stýriflaug sem verið var að flytja frá Íran til Líbanon og var ætluð Hezbollah-samtökunum.

Sýrlenskir ríkisfjölmiðlar halda því fram að eldflaugarnar hafi hæft þrjár herstöðvar og rannsóknarstofu í grennd við Damaskus og að mannfall hafi orðið. Þetta er önnur loftárásin sem Ísrael gerir á Sýrland síðustu daga og sú þriðja frá áramótum.

Í bréfi sem utanríkisráðuneyti Sýrlands sendi Sameinuðu þjóðunum kemur fram að þarlend stjórvöld fordæmi árásina og telji hana svívirðilega. Þar segir jafnframt að mikil eyðilegging hafi orðið í höfuðborginni við árásina og að með henni hafi ísraelsk stjórnvöld lagt sýrlenskum hryðjuverkamönnum lið, en þar er átt við her uppreisnarmanna sem hafa barist við sýrlensk stjórvöld í nærri tvö ár.

Aðgerðasinnar í Sýrlandi segja ísraelsku eldflaugarnar hafa hæft skotmark sitt því mikil sprenging hafi orðið við árásina og að mikill appelsínugulur blossi hafi blossað upp í kjölfar hennar. Sýrlenskur blaðamaður sagði í viðtali við breska ríkisútvarpið, BBC, að það væri engu líkara en að jarðskjálfti hefði skekið borgina.

Frá því að uppreisnin í Sýrlandi hófst í mars árið 2011 hafa ísraelsk stjórnvöld ítrekað lýst því yfir að þau ætli ekki að blanda sér í átökin.

Benjamín Netanjahú, forsætisráðherra Ísraels, hefur þó áður komið því á framfæri að leiki grunur á um að verið sé að flytja vopn ætluð Hezbollah um Sýrland verði gripið til aðgerða líkt og nú hafi komið til.

Á meðan segjast sýrlensk stjórnvöld, undir stjórn Bashar Assad forseta, líta svo á að með árásunum sé Ísraelsher að veita uppreisnarmönnum lið. Með þessu eru sýrlensk stjórnvöld talin reyna að grafa undan trúverðugleika uppreisnarmanna. Haldi árásirnar áfram stendur stjórn Assads þó frammi fyrir mikilli valþröng; aðgerðaleysi að hálfu stjórnvalda mætti túlka sem veikleika en gjaldi þau líku líkt er hætta á enn frekari árásum frá öflugum her Ísraels.