Pattstaða á nýja þinginu

Pattstaða er komin upp á ítalska þinginu eftir kosningarnar. Fimm stjörnu hreyfing grínistans Beppes Grillo virðist vart líkleg til að koma til bjargar.

Ítalski grínistinn Beppe Grillo og félagar hans í Fimm stjörnu hreyfingunni nota orðið „stjórnmálamaður“ nánast eins og blótsyrði. Eftir þingkosningarnar á sunnudag og mánudag er hreyfingin komin með 109 þingmenn í fulltrúadeild ítalska þingsins og 54 þingmenn í öldungadeildinni.

Þetta nýja en óútreiknanlega stjórnmálaafl féll í kramið hjá kjósendum, hlaut fjórðung atkvæða og virðist nú standa í vegi fyrir því að hægt sé að mynda starfhæfa stjórn.

Versta martröð gömlu flokkanna hefur því ræst og meðal leiðtoga annarra Evrópusambandsríkja hefur skelfing gripið um sig. Ekki virðist vera hægt að treysta því að ítölsk stjórnvöld geti komið böndum á efnahagslífið, eins og stjórn hagfræðingsins Marios Monti hafði reynt að gera. Markaðir brugðust jafnframt ókvæða við og féllu ítölsk verðbréf um nokkrar prósentur.

Pier Luigi Bersani, leiðtogi bandalags vinstri- og miðjuflokka, er að vísu með traustan meirihluta í neðri deild þingsins. Bersani hafði heitið því að halda áfram þeirri ströngu aðhaldsstefnu sem Mario Monti fylgdi síðastliðið ár og getur því styrkt stjórn sína enn frekar með því að fá Monti til liðs við sig.

Allt önnur staða er hins vegar uppi í öldungadeildinni, þar sem flokkar þeirra Bersanis og Montis ná ekki þingmeirihluta. Til þess að frumvörp verði að lögum þarf samþykki beggja þingdeilda, þannig að í reynd yrði stjórn þeirra algerlega upp á náð og miskunn bandalags hægriflokkanna komin, sem er undir forystu Silvio Berlusconis. Berlusconi vill vinda ofan af þeim aðhaldsaðgerðum sem Monti hefur staðið fyrir þannig að vart er sjáanlegur neinn alvöru samstarfsflötur.

Þótt hreyfing Grillos sé með 54 þingmenn í efri deildinni er vandséð að hún komi Bersani til hjálpar. Ítalir eru því farnir að sjá fram á nýjar kosningar innan fárra mánaða.gudsteinn@frettabladid.is