Lettar sækja um aðild að evrusvæði

Lettnesk stjórnvöld hyggjast sækja um aðild að evrusvæðinu í næsta mánuði, þrátt fyrir þá alvarlegu kreppu sem hrjáð hefur evruríkin undanfarin misseri. Lettar vonast til þess að geta tekið upp evruna strax árið 2014.

Lettland, sem er þriðja fátækasta ríki Evrópusambandsins, yrði þar með 18. landið á evrusvæðinu. Nágrannaríkið Eistland fékk aðild að evrusvæðinu árið 2011 og Lettar stefna að því að sækja um aðild á næsta ári. Þar með verða öll Eystrasaltslöndin komin með evru.

„Við lítum á þetta sem eins konar öryggiskerfi,“ hefur breska dagblaðið The Guardian eftir Algirdas Butkevicius, forsætisráðherra Lettlands. Hann segist ekki hafa áhyggjur af ólgunni á evrusvæðinu, enda sé Lettland nú þegar að verulegu leyti háð evrusvæðinu. „Efnahagur okkar er algerlega evruvæddur: Áttatíu prósent af lánum, heimilishaldi og fyrirtækjarekstri eru í evrum,“ segir Butkevicius. - gb