Olli uppnámi og skelfingu

Vísindamenn telja að loftsteinninn, sem splundraðist yfir Rússlandi í gær, hafi verið tíu tonn að þyngd. Brotunum rigndi yfir íbúa við Úralfjöllin, ollu sprengingum og eignatjóni. Hátt í þúsund manns þurftu að leita sér læknisaðstoðar.

„Það varð uppi fótur og fit. Enginn vissi hvað var að gerast. Allir fóru á milli húsa til að athuga hvort allt væri í lagi með fólk,“ sagði Sergei Hametov, íbúi í Tsjeljabinsk, stærstu borginni á því svæði sem varð fyrir loftsteinaregninu.

„Við sáum skyndilega mikið ljós og fórum út til að kanna hvað væri að gerast. Þá heyrðum við mjög háværar sprengidrunur.“?

Loftsteinninn er talinn hafa nálgast jörðu á miklum hraða, á um 54 þúsund kílómetrum á klukkustund. Hann splundraðist í 30 til 50 kílómetra hæð yfir jörðu og dreifðust brot úr honum yfir mjög stórt svæði. Miklar sprengingar urðu til þess að víða brotnuðu rúður í gluggum. Stærsta brotið hafnaði á endanum í ísilögðu stöðuvatni skammt frá bænum Tsjebakúl.

Nokkuð algengt er að loftsteinar komi inn í andrúmsloft jarðar. Oftast brenna þeir upp en sumir lenda á jörðinni í mismunandi mörgum pörtum. Það gerist nokkrum sinnum á ári, en aðeins á fimm til tíu ára fresti hafa þeir umtalsverð áhrif. Sjaldnast gerist það þó á byggðu bóli, þannig að tjónið verður yfirleitt lítið.

Engin tengsl eru talin vera á milli loftsteinsins, sem splundraðist yfir Úralfjöllum, og 130 þúsund tonna smástirnis sem þaut fram hjá jörðu seint í gær í um það bil 28 þúsund kílómetra fjarlægð. Engin skráð dæmi eru um að smástirni af þessari stærð hafi farið þetta nálægt jörðu.

Rússneski þingmaðurinn Vladimír Sjírínovskí, sá kokhrausti þjóðernissinni, kom reyndar auga á aðra hlið á loftsteinaregninu en flestir aðrir: „Þetta eru ekki loftsteinar að falla, heldur eru Bandaríkjamenn að gera tilraun með nýtt vopn.“