Fyrsti niðurskurður frá upphafi

Leiðtogar ESB-ríkjanna 27 náðu í gær samkomulagi um fjárlagaramma sambandsins fyrir árin 2014 til 2020, en samkvæmt honum verður sett útgjaldaþak við rúma 900 milljarða evra á tímabilinu. Samkomulagið felur í sér þriggja prósenta niðurskurð frá yfirstandandi tímabili, en þetta er fyrsti niðurskurðurinn í framlögum til ESB í 56 ára sögu sambandsins.

Niðurstaða fékkst ekki fyrr en eftir rúmlega sólarhrings samningatörn. Skiptar skoðanir voru milli ríkjanna, en farið var bil beggja með því að draga úr útgjöldum, um leið og staðinn var vörður um niðurgreiðslur til landbúnaðar og uppbyggingu innviða.

Samkomulagið á þó eftir að fara fyrir Evrópuþingið, en þar er óánægja með niðurskurðinn. Herman Van Rompuy, forseti leiðtogaráðs ESB, hvatti þó þingmenn til að íhuga vandlega mögulegar afleiðingar þess að samkomulaginu yrði hafnað.- þj