Blaðberi bjargaði lífi mæðgina í brennandi íbúð

Ungur blaðburðarmaður bjargaði lífi mæðgina úr brennandi íbúð í Mosfellsbæ upp úr klukkan sex í morgun.

Þegar hann koma að húsinu fann hann reykjarlykt út um kjallaradyr, og hringdi þegar í Neyðarlínuna og reyndi að gera íbúunum vart við sig.

Þegar það gekk ekki, vakti hann fólkið á efri hæðinni, sem fór niður og vakti konuna og son hennar. Þau og fólkið reyndu í fyrstu að slökkva eldinn en hann magnaðist ört og forðuðu allir sér út.

Töluverður eldur logaði í íbúðinni þegar slökkviliðið kom á vettvang og var slökkvistarfi og reykræstingu ekki lokið fyrr en um klukkan átta.

Fólkinu úr íbúðinni varð ekki meint af reyk, en varðstjóri hjá slökkviliðinu fullyrðir að blaðburðarmaðurinn hafi þarna bjargað mannslífum.

Íbúðin og innbú eru stórskemmd, en eldsupptök eru ókunn.