Kjarnorkusprenging Norður Kóreumanna fordæmd víða um heiminn

Kjarnorkusprenging Norður Kóreumanna í nótt hefur verið fordæmd víða um heiminn.

Um er að ræða þriðju kjarnorkusprengingu Norður Kóreumanna á síðustu sjö árum. Stjórnvöld í Norður Kóreu staðfestu sprenginguna í morgun en hún kom víða fram á jarðskjálftamælum.

Sérfræðingar í Suður Kóreu segja að krafturinn í sprengingunni hafi verið á bilinu sex til sjö kílótonn sem er um helmingur kraftsins í sprengjunni sem varpað var á Hiroshima.

Kínverjar hafa gagnrýnt sprenginguna í morgun en þeir eru eina þjóðin í heiminum sem enn styður Norður Kóreu.

Barack Obama Bandaríkjaforseti var harðorður í fordæmingu sinni á þessu athæfi Norður Kóreumanna. Obama segir Norður Kóreumenn ógna öryggi og friði í heiminum og hann krefst þess að alþjóðasamfélagið grípi strax til víðtækra og raunhæfra aðgerða gegn þeim.

Af öðrum leiðtogum sem hafa tjáð sig um málið má nefna Shinzo Abe forsætisráðherra Japans sem segir að kjarnorkusprengingin sé ógn við öryggi Japana.

Þá krefst William Hague utanríkisráðherra Bretlands þess að Öryggisráðið grípi til aðgerða á fundi sínum í dag en sá fundur hefst klukkan tvö að okkar tíma.

Ban Ki-moon framkvæmdastjóri Sameinuðu þjóðanna hefur fordæmt sprenginguna og segir hana klárt og alvarlegt brot á samþykktum Sameinuðu þjóðanna.