Skemmtiferðaskip rekur um vélarvana á Mexíkóflóa

Skemmtiferðaskipið The Carnival Triumph rekur um vélarvana á Mexíkóflóa en um borð eru rúmlega 3.100 farþegar auk áhafnar sem telur rúmlega 1.000 manns.

Skipið missti allt afl um helgina í framhaldi af því að eldur braust út í vélarrúmi þess. Engan sakaði í eldsvoðanum.

Skipið er á reki í um 240 kílómetra fjarlægð frá Yucatan skaganum og bíður þess að tveir dráttarbátar komi á staðinn og dragi það til hafnar í Mexíkó. Þaðan verður farþegunum svo flogið til Texas en skipið hóf ferð sína frá Galveston í Texas og átti að koma þangað aftur í gærdag.