Eineggja tvíburar eru nær óleysanlegt mál fyrir lögregluna í Marseille

Lögreglan í Marseille í Frakklandi er með mál í höndunum sem er nær óleysanlegt þar sem glæpamaðurinn er eineggja tvíburi.

Lögreglan handtók fyrir síðustu helgi eineggja tvíbura í tengslum við rannsókn á kynferðislegum árásum og nauðgunum á sex konum frá því síðasta haust og fram til janúar s.l. Tvíburar þessir eru 24 ára gamlir og heita Elwin og Yohan.

Bæði myndbandsupptökur frá opinberum stöðum og eitt fórnarlambanna benda á annan af tvíburunum sem þann sem stóð að árásunum. Vandinn er að ekki er hægt að greina á milli þeirra, hvorki á upptökunum né getur fórnarlambið sagt til um hvor þeirra var að verki.

Til er erfðaefni, eða DNA, frá vettvangi glæpanna. Það sönnunargagn er þó til lítils fyrir lögregluna því að um eineggja tvíbura er að ræða og því eru erfðaefni þeirra eða DNA næstum nákvæmlega þau sömu.

Lögreglunni hefur verið tjáð að nákvæm erfðarannsókn til að finna út hvor tvíburana sé glæpamaðurinn, eða jafnvel þeir báðir, muni kosta um milljón evrur eða yfir 170 milljónir kr. en það er fé sem lögreglan á ekki til.