Gægjubræður fá makleg málagjöld

Þeir fengu háðuglega útreið bræðurnir Eduard Petrovich Kovynev og Eduard Alexander Kovynev, báðir á þrítugsaldri, þegar þeir hrundu niður um falskt loft á kvennaklósetti en þar voru þeir staddir í þeim vafasama tilgangi að liggja á gægjum.

Frá þessu greinir í Atlanta Journal Constitution en atvikið átti sér stað í kvikmyndahúsi í Georgíu. Bræðurnir höfðu mun meiri áhuga á því sem var að gerast á kvennaklósettinu en á hvíta tjaldinu, og skriðu um loftið á karlaklósettinu yfir að kvennaklósettinu. En, þangað komnir hrundu þeir niður í gegnum loftið, beint á gólfið þar. Samkvæmt blaðinu voru þeir þar með að ráðast inn á einkarými fjölda viðskiptavina.

Þeir gægjubræður hafa verið ákærðir fyrir gægjur, eða það að vera Peeping Tom eins og það heitir á ensku og eignaskemmdir.