Glæpamenn streyma aftur til Noregs eftir brottvísun úr landi

Glæpamenn af erlendum uppruna sem vísað hefur verið úr landi í Noregi vegna glæpa sinna streyma aftur til landsins í miklum mæli.

Í frétt um málið í Aftenposten segir að þannig hafi norska lögreglan handtekið að nýju nærri 500 glæpamenn á síðustu tveimur árum en þeim hafði öllum verið vísað úr landi áður. Venjulega fá þessir glæpamenn 40 daga fangelsisvist fyrir endurkomuna og er svo aftur vísað úr landi.

Í fyrra var nær 1.200 glæpamönnum vísað úr landi í Noregi eða tvöfalt fleirum en árið áður. Lögmaður sem rætt er við telur að refsingin fyrir að nást aftur eftir útvísun sé of mild og vill herða hana.