Mótmæli í kjölfar hatursglæps

Þúsundir New York-búa hafa tekið þátt í mótmælum í Greenwich Village-hverfinu vegna morðs sem þar var framið á föstudag.

Mark Carson, 32 ára samkynhneigður maður, var skotinn í höfuðið og vitni segja banamanninn hafa öskrað hatursfull orð um kynhneigð Carsons skömmu áður og haft í hótunum við vin hans.

Carson hefur verið lýst sem „samkynhneigðum engli“ og héldu mótmælendur skiltum á lofti í minningu hans á meðan þeir kölluðu eftir strangari skotvopnalöggjöf.

„Það leikur enginn vafi á því að maðurinn var myrtur eingöngu vegna kynhneigðar sinnar,“ segir lögreglustjórinn Ray Kelly, en hann segir Carson ekki hafa gert neitt til þess að ögra árásarmanni sínum.

Hinn grunaði heitir Elliot Morales og er 33 ára gamall, en morðið hefur vakið hörð viðbrögð innan samfélags samkynhneigðra í New York.

Það er ekki síst vegna þess að það var framið skammt frá vettvangi Stonewall-uppreisnarinnar svokölluðu, en hún markaði tímamót í réttindabaráttu samkynhneigðra árið 1969.