Kerry tekur við af Clinton

Öldungadeildarþingmaðurinn John Kerry mætti engri mótstöðu í utanríkismálanefnd deildarinnar í gær þegar hún samþykkti einróma að hann yrði næsti utanríkisráðherra Bandaríkjanna.

Búist var við því að síðar í gær myndi öldungadeildin leggja blessun sína yfir að hann taki við af Hillary Clinton, sem hefur verið utanríkisráðherra frá því Barack Obama tók við embætti forseta fyrir fjórum árum.

Obama er að gera fleiri mannabreytingar í stjórn sinni þessa dagana, þegar seinna kjörtímabil hans er nýhafið.

Hvorki Chuck Hagel, sem Obama ætlar að gera að varnarmálaráðherra, né John Brennan, sem til stendur að verði yfirmaður leyniþjónustunnar CIA, eiga þó von á jafn góðum stuðningi meðal öldungadeildarþingmanna. Báðir hafa sætt töluverðri gagnrýni meðal repúblikana í deildinni.

Kerry bauð sig fram til forseta Bandaríkjanna árið 2004 en tapaði fyrir George W. Bush. Kerry sóttist aftur eftir því að verða forsetaefni Demókrataflokksins árið 2008 en Obama hafði betur, varð forsetaefni flokksins og vann sigur í kosningunum.- gb