„Nautalasagne“ allt að hundrað prósent hrossakjöt

Niðurstöður rannsókna á nautalasagne frá Findus sýna fram á að ellefu tegundir af átján innihalda hrossakjöt. Samkvæmt mælingum var hrossakjötsmagnið frá sextíu og allt upp í hundrað prósent í réttunum.

Catherine Brown hjá breska matvælaeftirlitinu segir ólíklegt að um mistök sé að ræða og í kjölfarið hefur öllum matvælafyrirtækjum verið gert skylt að gera innihaldsprófanir á vörum sínum.

Matvælaeftirlitið segir engar sannanir liggja fyrir um að lög hafi verið brotin, en Findus hafa nú verið skikkaðir til að framkvæma mælingar til að ganga úr skugga um að vörur þeirra innihaldi ekki verkjalyfið phenylbutazone, sem ætlað er húsdýrum. Neysla dýrakjöts sem inniheldur lyfið er talin skaðleg mönnum.

Umhverfisráðherra Bretlands, Owen Paterson, segir framferði Findus „algjörlega óásættanlegt", og hafa vörurnar verið innkallaðar úr matvöruverslunum. Þá eru þeir sem þegar hafa keypt þær hvattir til þess að skila þeim.