Hundruð flýja heimili sín vegna flóða

Mikil flóð hafa verið í nótt í Noregi, í grennd við Osló.

Þurft hefur að flytja fleiri hundruð manns af heimilum sínum vegna flóðanna. Allar lestarferðir milli Osló og Þrándheims liggja niðri og flestir vegir milli þessara borga eru nú lokaðir. Mikill fjöldi björgunarmanna er nú að störfum, við að aðstoða fólk sem er innlyksa vegna vatnselgsins.

Flóðin koma í framhaldi af einhverju mest úrhelli á þessum slóðum í manna minnum. Ekki er vitað um neinn mannskaða vegna þessara miklu flóða. Í Verdens Gang segir að þjóðvegur E6 sé nánast eins og stórfljót, þar veður vatn yfir og um. Allar ár á svæðinu hafa flætt yfir bakka sína.