Segja að hljómsveitin hafi kveikt í skemmtistaðnum Kiss

Rannsakendur á eldsvoðanum á skemmtistaðnum Kiss í Brasilíu, sem varð 234 að bana fyrr í vikunni, telja fullvíst að eldur hafi kviknað út frá blysum sem hljómsveit notaði sama kvöld.

Þá er því einnig haldið fram að þeir hafi að auki vitað að blysin væru eingöngu til notkunar utandyra. Þetta kom fram á blaðamannafundi með lögreglunni í dag.

Eldsvoðinn er mikill harmleikur og hafa íbúar í borginni Santa Maria verið harmi slegnir eftir atvikið. Gestir voru á milli eitt og tvö þúsund og örvænting greip um sig þegar eldur kviknaði. Gestir ýttu hvorum öðrum í tilraun sinni til þess að komast út auk þess sem dyraverðir reyndu í fyrstu að varna fólki að komast út.

Í frétt AP fréttaveitunnar um málið er haft eftir rannsóknarlögreglumanninum Marcelo Arigony að rannsóknin muni taka um 20 daga og svo verður málið sent ákæruvaldinu. Rannsóknir hafi þó þegar staðfest að húsnæðið var stórhættulegt enda engir neyðarútgangar né vatnsúðarar í loftinu.

„Hvaða barn sem er gat séð að þessi staður átti aldrei að opna," sagði Arigony á blaðamannafundinum.