Vermont fylki slakar á klónni gagnvart kannabisefnum

Fulltrúadeild Vermont fylkis samþykkti í vikunni frumvarp sem miðar að því að lækka verulega refsingar við vörslu kannabisefna í fylkinu. Ef frumvarpið verður samþykkt í öldungadeildinni verður ekki lengur glæpsamlegt að vera með allt að 28 grömm af efninu á sér.Í staðin geta þeir sem verða uppvísir að vörslu þess átt von á því allt að 300 dollara sekt, svipaðs eðlis og stöðumælasekt. 92 fulltrúar studdu frumvarpið en 49 voru á móti.

Þá felur frumvarpið í sér þá nýbreytni að brot á lögunum skilur ekki eftir sig nein varanleg spor á sakaskrá viðkomandi. Eins og sakir standa geta þeir sem verða uppvísir að vörslu efnisins átt erfitt með að fá vinnu og misst rétt til ýmissa bóta, en ef frumvarpið verður að lögum heyrir það sögunni til.



Frumvarpið á eftir að fara fyrir öldungadeildina í Vermont, en líkur standa til að hún muni samþykkja frumvarpið.

Stuðningsmenn frumvarpsins skiptust í tvo hópa; annars vegar þá sem vildu ekki að varsla kannabisefna myndi koma fram á sakaskrá viðkomandi og þannig takmarka verulega framtíðarmöguleika ungs fólks og hinsvegar stuðningsmenn lögleiðingar, sem sjá frumvarpið sem skref í átt að lögleiðingu efnisins.

„Ef þetta er skref í átt að því að lögleiða efnið svo að við getum skattlagt það og stýrt því betur, þá er það skref ég ég er tilbúinn að taka," sagði demókratinn Tony Klein. Klein bætti því svo við að hann hefði ekki neytt áfengis eða annarra vímuefna í meira en 28 ár.

Meðlimir nefndarinnar sem sömdu lagafrumvarpið tóku þó ekki í sama streng og neituðu því að markmiðið með frumvarpinu væri að stíga skref í átt lögleiðingar. „Það var ólöglegt í gær, það er ólöglegt í dag og ef frumvarpið verður að lögum í báðum deildum þingsins verður það áfram ólögleg," sagði demókratinn Linda Waite-Simpson sem átti sæti í nefndinni sem kynnti frumvarpið fyrir kollegum sínum.

Vermont verður þá sextánda fylki Bandaríkjanna til að afglæpavæða vörslu kannabisefna. Þar af eru tvö fylki, Colorado og Washington, sem hafa gengið skrefinu lengra og lögleitt vörslu neysluskammta með miklum stuðningi kjósenda.

Richard Sears, formaður dómsmálanefndar öldungadeildarinnar sagði á föstudaginn síðastliðinn að hann byggist við því að öldungadeildin myndi samþykkja frumvarpið með miklum mun. „Ég býst við að tvöfalt fleiri segi já en nei." Hann vildi þó ekki gefa upp afstöðu sína til frumvarpsins. „Það eru smáatriðin sem skipta öllu máli," sagði Sears. Það sem truflar hann helst er það að einstaklingar undir 21 árs aldri gætu fengið dóm fyrir vörslu áfengis en ekki kannabisefna undir 28 grömmum. „Það finnst mér óskiljanlegt," bætti Sears við.

Sumir repúblikananna studdu frumvarpið en meginþorri þeirra sem veittu því andstöðu eru repúblikanar. Ein þeirra sem styðja ekki frumvarpið er Cynthia Browning, sem sagði efnið „kröftugt geðlyf." Hún tók undir með öðrum sem sögðu að samþykkt frumvarpsins myndi senda þau skilaboð til ungs fólks að yfirvöldum væri ekki alvara með að banna efnið.

Sjá nánar á Valley News og Burlington Free Press