Óður jarðarberjabóndi skaut starfsmenn sína

Um þrjátíu farandverkamenn, flestir frá Bangladess, særðust í dag þegar yfirmaður þeirra skaut þá.

Atvikið átti sér stað á jarðarberjabúgarði í gríska þorpinu Nea Manolada, og þótti yfirmönnum búgarðsins að sér þjarmað þegar um tvöhundruð verkamenn komu til þess að rukka þá um ógreidd laun.

Einn þeirra brá því á það ráð að skjóta á mennina og voru nokkrir þeirra fluttir á sjúkrahús í kjölfarið. Enginn er þó alvarlega slasaður.

Tveir yfirmenn hafa þegar verið handteknir vegna málsins, auk þess sem handtökuskipun hefur verið gefin út á hendur tveggja til viðbótar.

Slæmur aðbúnaður vinnufólks á svæðinu hefur margsinnis verið gagnrýndur og hefur meðal annars internetherferð verið hrint af stað, sem hvetur fólk til þess að kaupa ekki jarðarber af svæðinu. Eru þau kölluð „blóðjarðarber“.