Þrjú met í sjónmáli í kvöld

Íslenska karlalandsliðið fær kjörið tækifæri til að endurskrifa söguna á næstu fimm dögum en fram undan eru leikir á móti Kýpur og Noregi í undankeppni HM 2014 þar sem strákarnir eiga enn möguleika á að komast á sitt fyrsta stórmót.

HM í Brasilíu 2014 er ekki lengur fjarlægur draumur eftir frábæra frammistöðu liðsins undir stjórn Lars Lagerbäck. Fyrsta skrefið og jafnframt það mikilvægasta í dag er að landa þremur stigum á móti botnliði Kýpur í Laugardalnum annað kvöld og takist það fær íslenska liðið úrslitaleik á móti Norðmönnum í Osló.

Íslenska liðið náði í fjögur stig af sex mögulegum í síðustu landsleikjatvennu sem var í fyrsta sinn í þessari undankeppni sem liðið nær stigi í báðum leikjunum í landsleikjatörn. Fram að því höfðu alltaf skipst á frábærir sigrar og svekkjandi töp.

Liðið vann 2-1 sigur á Albönum í síðasta leik og getur nú unnið tvo heimaleiki í röð í fyrsta sinn í þessari undankeppni takist strákunum að brjóta niður varnarmúr Kýpurliðsins í kvöld.

Með sigri á Kýpur kæmust íslensku strákarnir ekki aðeins í frábæra stöðu fyrir lokaumferð riðilsins því þeir myndu einnig slá þrjú met í sama leiknum.

Vinni íslenska liðið leikinn setur það nefnilega met í stigum, mörkum og sigrum í undankeppni stórmóta.

Undankeppni EM 2004

Besti árangur íslenska liðsins hingað til er í flestra huga undankeppni EM 2004 þegar Ísland átti möguleika á sæti á EM allt fram að síðasta leik.

Íslenska liðið vann þá meðal annars þrjá leiki í röð sumarið 2003 og fylgdi því eftir með því að ná jafntefli við Þjóðverja á Laugardalsvellinum. Ísland sat í umspilssætinu fyrir lokaumferðina en mætti þá Þýskalandi á útivelli.

Ísland tapaði þeim leik 0-3 og Darren Fletcher tryggði Skotum annað sætið í riðlinum með því að skora sigurmark á móti Litháum tuttugu mínútum fyrir leikslok.

Stigametið er aftur á móti frá undankeppni EM 2000 þegar íslenska landsliðið náði í 15 stig í 10 leikjum. Liðið náði í 13 stig í 8 leikjum í undankeppni EM 2004 og náði einnig 13 stigum í undankeppni HM 2002 en þá í 10 leikjum.

Íslenska liðið er þegar búið að jafna markametið sem var 14 mörk frá því í undankeppni HM 2002 og í undankeppni HM 2006 en í báðum þessum undankeppnum spilaði íslenska liðið tíu leiki.

Íslenska liðið hefur einnig jafnað metið yfir sigurleiki og getur nú orðið fyrsta íslenska landsliðið til að vinna fimm sigurleiki í einni og sömu undankeppninni.

Það er magnað að bera saman síðustu tvær undankeppnir því þar sést vel hvernig Lars Lagerbäck hefur gerbreytt gengi liðsins. Íslenska liðið vann aðeins 1 af 8 leikjum sínum undir stjórn Ólafs Jóhannessonar í undankeppni EM 2012 og alls aðeins 2 af 17 keppnisleikjum undir hans stjórn frá 2007 til 2011.

Síðast unnu þeir bara Kýpur

Strákarnir geta hins vegar enn náð lakari árangri en í síðustu undankeppni á einum vettvangi því þá kom eini sigur liðsins einmitt í heimaleiknum á móti Kýpur. Íslenska liðið tapaði fyrri leiknum 0-1 á Kýpur og hefur ekki efni á því að misstíga sig aftur í seinni leik þjóðanna á Laugardalsvellinum.

Sigur gæti aftur á móti komið strákunum í lykilstöðu fyrir lokaleikinn á Ullevaal-leikvanginum. Það er ljóst að stuðningurinn verður til staðar, það er löngu uppselt á leikinn og vonandi virkar þessi „pressa“ jákvætt á landsliðsmennina í Laugardalnum í kvöld.