Þjóðverjar striplast en Frakkar eru í Speedo

Ferðavefurinn Expedia sendi nýverið frá sér niðurstöður rannsóknar sem ætluð er að kortleggja svokallaða strandhegðun ferðafólks. 8.606 manns svöruðu skoðanakönnun og nær sá fjöldi yfir ferðamenn víða að.

Niðurstöðurnar voru þær að flestir vilja eyða fríinu á sólarströnd, og þar eru Þjóðverjar frjálslegastir allra þjóða. 17 prósent þýskra ferðamanna hafa legið naktir í sólbaði á sólarströnd, en Frakkar eru ólíklegastir Evrópubúa til að gera slíkt samkvæmt könnuninni.

Speedo-sundkýlur koma ekki vel úr könnuninni og aðeins um helmingur bandarískra sóldýrkenda telur slíkan sundfatnað ásættanlegan á ströndinni. Japanir og Norðmenn eru enn neikvæðari í garð Speedo-skýlunnar, en aðeins 29 og 34 prósent þeirra telja hana við hæfi.

Allt aðra sögu er að segja af Frökkum, en 91 prósent þeirra er himinlifandi með Speedo-skýlurnar.