Reyndi að smygla peningabúntum inn í landið - innvortis!

Fjörutíu og fjögurra ára gömul kona frá Gvatemala var handtekin á flugvellinum í Panama á dögunum eftir að hún reyndi að smygla peningum inn í landið.

Þetta var engin smá upphæð 31 þúsund dollarar, eða um fjórar milljónir króna. Það sem var heldur óvenjulegt við þetta hjá henni er að hún var með peningana innvortis. Peningarnir voru í 39 upprúlluðum búntum, sem konan hafði gleypt.

Tollvörðum fannst hegðun konunnar eitthvað óvenjuleg og ákváðu að ræða við hana frekar. Þegar hún samþykkti að fara í röntgenmyndatöku, komu peningabúntin í ljós.

Hún dvelur nú á spítala og er beðið eftir því að peningarnir skili sér. Hún verður að öllum líkindum ákærð fyrir að reyna smygla peningum ólöglega inn í landið.