Sækja um að fá að búa á Mars

Hefur þú áhuga á að eyða restinni af ævinni á Mars? Þú getur þá sótt um að fá far þangað. Ekki er fyrirhugað að komið verði aftur til jarðar.

Mars One er félag sem fyrirhugar að senda manneskjur aðra leiðina til Mars árið 2023 í þeim tilgangi að reyna að koma á varanlegri búsetu á plánetunni.

„Við erum mjög spennt að fara að stað með valferlið," sagði Bas Landorp, einn stofnenda Hollenska félagsins og framkvæmdastjóri þess í tilkynningu í tilefni þess að byrjað væri að taka á móti umsóknum. „Þetta er alþjóðlegt verkefni og það er mikilvægt að hver sem er hvar sem er geti spurt sig: Vil ég gera þetta? Er ég tilbúinn í þetta? Ef svarið er já þá viljum við heyra í þér."

Umsækjendur þurfa að vera 18 ára og eldri, „þroskaðir og áhugaverðir," en engin krafa er gerð um menntun eða starfsreynslu enda munu þeir sem verða fyrir valinu eyða sjö árum í þjálfun og undirbúning fyrir brottför.

Norbert Kraft, yfirmaður heilbrigðismála hjá félaginu, sagði að vegna þess að um væri að ræða varanlega búsetu væri helsta áhyggjuefnið „hvernig hver og einn geimfari hrærist og starfar með öðrum og hæfni þeirra til að takast á við ýmis vandamál út ævina," og síður hvort viðkomandi væri sérstaklega hugrakkur eða hefði reynslu af því að fljúga hraðfleygum þotum.

Umsóknarferlið verður opið til 31. ágúst 2013. Umsækjandi þarf að:

• Greiða þarf umsóknargjald byggt á vergri landsframleiðslu heimalands umsækjanda (umsækjandi frá Kanada þarf til dæmis að greiða 33 dollara)
• Veita ýmsar upplýsingar um sjálfan sig
• Skrifa bréf um ástæður umsóknarinnar
• Senda mínútu langt myndband þar sem hann útskýrir hvers vegna hann ætti að vera meðal fyrstu manneskjanna til að koma til Mars

Sérfræðingar á vegum félagsins munu svo velja úr umsóknum. Umsóknarferlið skiptist í fjögur stig, en þeir sem verða fyrir valinu í upphafi þurfa að standast læknisskoðanir í öðru stigi umsóknarinnar. Umsækjendur munu svo keppast um sæti í stigi þrjú og fjögur sem verður sjónvarpað, en ætlunin er að áhorfendur muni svo velja þá sem munu tryggja sér sæti á ferjunni.

Félagið áætlar að heildarkostnaðurinn við verkefnið verði sex milljarðar bandaríkjadala sem það hyggst safna með styrktarfé og sölu sjónvarpsréttinda.

Nánar um málið á vef CBC.