Uppreisnarmenn í Sýrlandi ná mikilvægum flugvelli á sitt vald

Uppreisnarmenn í Sýrlandi náðu á sitt vald í morgun hernaðarlega mikilvægum flugvelli í norðurhluta landsins, Minnagh við tyrknesku landamærin. Þetta er nokkuð áfall fyrir stjórnarher Assads forseta sem missir með þessu fótfestu á svæði þar sem bardagar hafa geisað um langa hríð.

Þetta er stærsti sigur uppreisnarmanna síðan þeir náðu undir sig Taftanaz-flugvellinum í norðurhluta landsins í janúar.



Bresk mannréttindasamtök sem starfa á svæðinu sögðu að Minnagh flugvöllurinn hafi fallið í hendur uppreisnarmanna um dagrenningu, eftir um sólarhringsáhlaup uppreisnarmanna, þar sem vígamenn tengdir al-Kaída hafi verið fremstir í flokki.

Flugvöllurinn er inni á svæði sem uppreisnarmenn hafa haldið lengi og hafa bardagar staðið um hann frá því á síðasta ári. Stjórnarherinn hefur styrkt stöðu sína víða í landinu síðustu mánuði, en uppreisnarmenn hafa síðustu daga hertekið fjögur þorp í heimahéraði Assads sjálfs við Miðjarðarhafsströnd.

Yfir 100.000 manns hafa fallið í borgarastyrjöldinni í Sýrlandi frá því að átök hófust vorið 2011.