Svipti sig lífi til að mótmæla giftingum samkynhneigðra

Karlmaður svipti sig lífi í Notre Dame-kirkjunni í París í gær fyrir framan fjölda fólks. Var kirkjan rýmd í kjölfarið.

Maðurinn sem lést, Dominique Venner, er þekktur sagnfræðingur í Frakklandi og dró hann fram byssu og skaut sig í höfuðið við hlið altarisins í návist um 1.500 ferðamanna sem staddir voru í kirkjunni. Hann var 78 ára gamall.

Skömmu fyrir sjálfsvígið birti hann bréf á bloggsíðu sinni þar sem hann fordæmdi ákvörðun stjórnvalda um að lögleiða giftingar samkynja para, en Venner var íhaldssamur þjóðernissinni og mjög andvígur lögleiðingunni. Einnig varar hann við auknum fjölda innflytjenda.

Leiðtogi þjóðernissinnaða hægriflokksins Front National, Marine Le Pen, segir verknaðinn hápólitískann og í þeim tilgangi að „vekja“ Frakka.