Takmarkanir settar á úttektir í bönkum

Bankarnir á Kýpur búa sig undir að opna útibúin í dag, eftir nærri tveggja vikna lokun meðan ráðamenn voru að ná samkomulagi við Evrópusambandið um neyðarlán.

Takmarkanir verða þó áfram á því hve mikið viðskiptavinir tveggja stærstu bankanna, Laiki-bankans og Kýpurbanka, geta tekið út í einu. Þá hafa öryggisverðir verið ráðnir til að standa vörð um öll bankaútibú eyjunnar af ótta við að læti geti brotist út.

„Viðvera okkar á að hughreysta bæði starfsfólk bankanna og viðskiptavini,“ segir John Argyrou, framkvæmdastjóri öryggisþjónustufyrirtækis sem útvegar verðina. Hann á þó ekki von á miklum látum: „Það getur orðið einstaka atvik en kurteisi og þolinmæði er í menningu okkar, þannig að ég reikna ekki með neinu alvarlegu.“

Höftin verða í gildi í að minnsta kosti eina viku, eða þangað til ástandið róast. Lokun bankanna hefur valdið jafnt einstaklingum sem fyrirtækjum ómældum vandræðum.

Samkvæmt samkomulaginu, sem náðist á mánudag, verða báðir stærstu bankarnir endurskipulagðir. Stærstu viðskiptavinir þeirra þurfa að taka á sig tap en almenningi er hlíft. Laiki-bankanum verður skipt í „slæman“ og „góðan“ banka og sá góði sameinaður Kýpurbanka.