Lokaballið flutt á spítalann

Hin 14 ára Katelyn Norman greindist með krabbamein í beini í handlegg sínum fyrir tveimur árum. Hún á aðeins nokkra daga eftir ólifaða.

Katelyn hefur barist við krabbameinið undanfarin tvö ár og farið í fjölmargar aðgerðir til þess að vinna bug á meininu. Æxlunum hefur hins vegar aðeins fjölgað, krabbameinið borist í lungu og fyrir skömmu tilkynntu læknar að þeir gætu ekkert frekar gert. Baráttunni væri lokið.

Þegar þær fréttir bárust vinum og skólafélögum Katelyn í bænum LaFollette í Tennessee-fylki tóku þau sig til og skipulögðu lokaball (e. prom) til heiðurs Katelyn. Þema ballsins var „Katie in the Sky with Diamonds" sem er vísun í samnefnt lag Bítlanna um Lucy. Ballið var hluti af markmiði fjölskyldu og vina Katelyn að fylla síðustu daga hennar á jörðinni af eins mikilli gleði og mögulegt væri. Hafði Katelyn nefnt að eitt af því sem hún vildi gera áður en hún léti lífið væri að upplifa lokaball.

Katelyn hlakkaði mikið til ballsins og hafði ætlað að mæta. Kvöldið sjálft komu upp auknir öndunarerfiðleikar hjá táningnum sem varð til þess að hún þurfti að leggjast inn á spítala.

Vinir hennar og fjölskylda dóu þó ekki ráðalaus. Ballið var einfaldlega flutt á spítalann. Þar fékk hún blómvönd frá drengnum sem hún hafði ætlað með á ballið og borða þar sem hún var lýst drottning lokaballsins. Spítalinn var fallega skreyttur ljósum og borðum.

Átti upphaflega að lýsa upp veg Katelyn frá heimili hennar í skólann þar sem ballið skyldi fara fram. Þegar ljóst var að Katelyn kæmist ekki á ballið tóku vinnir hennar til sinna ráða. Var mynduð röð fyrir utan spítalann sem var á annan kílómetra að lengd. Var kveikt á kertum og höfðu viðstaddir á orði að um yndislega stund hefði verið að ræða.

Norman hafði sjálf hringt í skipuleggjendur ballsins og sagt þeim að ballið yrði að fara fram þótt hún kæmist ekki.

"Þannig er hún. Það er ekki annað hægt en að smitast af lífsorku hennar," sagði einn skipuleggjendanna.

Hér fyrir neðan má horfa á tilfinningaþrungið myndband þar sem saga Katelyn Norman er rakin.