Berlusconi í læknisskoðun samkvæmt dómsúrskurði

Silvio Berlusconi, fyrrverandi forsætisráðherra Ítalíu, hefur verið skipað að gangast undir læknisskoðun samkvæmt dómsúrskurði, en hann er á spítala vegna augnsýkingar og háþrýstings.

Lögfræðingar Berlusconi, sem ákærður er meðal annars fyrir mútur og að hafa samræði við ólögráða stúlku, segja hann ekki geta verið viðstaddan réttarhöldin vegna veikindanna en saksóknari telur Berlusconi ýkja veikindi sín til þess að tefja réttarhöldin og því hefur dómari fyrirskipað læknisrannsókn.

Í síðustu viku var Berlusconi dæmdur í eins árs fangelsi fyrir ólöglegar hleranir en talið er líklegt að hann áfrýji dómnum og gengur hann laus í millitíðinni.