Risagosið ekki bannað

Dómstóll í New York hefur ógilt yfirvofandi bann við sölu á risadrykkjum í borginni aðeins degi áður en bannið átti að taka gildi. Segir dómstóllinn bannið byggt á duttlungum ráðamanna, og að ómögulegt væri að framfylgja því.

Átti fyrirhugað bann að ná yfir sykraða hálfs lítra gosdrykki og stærri, á stöðum á borð við íþróttaleikvanga og veitingastaði. Matvöruverslanir hefðu mátt halda sölunni áfram.

Beitti Michael Bloomberg, borgarstjóri New York, sér fyrir banninu og átti það að hjálpa borgarbúum að takast á við offitupúkann, en viðbrögð almennings voru sterk og mótmæli voru haldin gegn banninu.

Yfirlögfræðingur borgarinnar segir að ógildingunni verði áfrýjað.